بالفيديو وائل غنيم في كلمته قبل 30 يونيو : يطالب الرئيس مرسي بالاستقالة و يهاجم سنة حكمه الأولى

ينشر حديثنا فيما يلي نص و فيديو كلمة الناشط السياسي وائل غنيم :

بسم الله الرحمن الرحيم

قال الله تعالي : ' واوفوا بالعهد ان العهد كان مسئولا '

السنة اللي فاتت وقت انتخابات الاعادة المرشح د. محمد مرسي خرج بمجموعة من العهود للشعب المصري علشان يكسب اصواتهم , الوعود ديه فعلا فرقت معاه بدليل انه كسب بفرق 2 في المائة بفضل الناس اللي النهاردة كتير منهم بيتقال عليهم عملاء للغرب وكارهين للدين.

وبعد الانتخابات بتلات ايام , حضرت ' اجتماع فيرمونت ' مع الرئيس قبل اعلان النتيجة الرسمية لما كان الاخوان خايفين من تزوير النتيجة فقرروا يؤكدوا علي التزامهم بوعودهم , الرئيس يوميها وعدنا انه هايكون رئيس لكل المصريين واكد التزامه بشعاره الانتخابي : ' قوتنا في وحدتنا ' , ولكن للاسف بعد سنة الواقع بقي : ' قوتنا في جماعتنا ' .

الرئيس يوميها وعدنا باحترام المعارضة ومشاركه الكل في القرار لكن لقينا نفسنا بدلنا حزب حاكم بيعتبر اللي بيعارضه خاين وعميل بحزب حاكم تاني بيعتبر اللي بيعارضه خاين وعميل وكاره للدين.

الرئيس في اجتماع فيرمونت وعد بالقصاص للي ماتوا في الثورة ولكن اللي شفناه ان في ناس لسه بتموت في عهده. الشباب اللي نزل فرحان في التحرير يهتف يوم فوزه , امهاتهم بتبكي حزن دلوقتي علي استشهادهم.

الرئيس يوميها وعد بالاعتماد علي اهل الكفاءة , و انهارده اكتر من اي نظام قبله شغال بنظرية اهل الثقة وتعيينات الوزراء و المحافظين خير دليل. وجماعته بتهدد بتمرير قانون السلطة القضائية لترهيب القضاة مش لاصلاح القضاء! جمل زي ' لو ما احترمتش الدستور انا عايزكم تثوروا عليا ' و ' الدستور ده مش هايعدي من غير توافق ' كانت جمل حلوة علشان تكسب الانتخابات وللاسف اتنست لما بقيت في السلطة. خلال السنة دي شفنا اعلان غير دستوري قسم المصريين , واستقال بسببه 4 من مستشاري الرئيس واكد مستشاره القانوني انه مكانش عنده علم بيه , بل حتي وزير العدل ونائب الرئيس اعلنوا عدم تاييدهم ليه.

كنتيجة لكل ده بقينا في ازمه سياسية نتج عنها تفاقم في الازمة اقتصادية صحيح النظام الحالي ورث مشاكل الاقتصاد من النظام اللي قبله ولكن بسياساته الخاطئة ساهم في زيادتها بدلا من علاجها. ازمات زي ارتفاع الاسعار وانخفاض الجنيه قصاد الدولار وتبخر وعود المائة يوم بتاعة الامن و الكهرباء و البنزين بعد 365 يوم.

سوء الاوضاع الاقتصادية وصل ان مؤيدي الرئيس بيعتبروا خبر اقتراض مصر من دول تانية خبر مفرح برغم ان القروض دي هيدفع تمنها ابناءنا واحفادنا.وبدل الاعتراف بالاخطاء , بنلاقي نظريات مؤامرة لتبرير الفشل وكلام عن انجازات وهمية.

والاخطر و الكارثي من كل ده الانقسام اللي وصلناله. الخطاب الاقصائي و الكراهية و التحريض ومباركة العنف واستحلال الدم و الاقتتال الاهلي بين المؤيدين و المعارضين زي ما حصل في الاتحادية و المقطم وكتير من المحافظات اصبح ظاهرة خطيرة في المجتمع. مفيش بلد بتتقدم و المجتمع منقسم بالشكل ده ودور رئيس الجمهورية الاساسي هو توحيد الصف. وللاسف د. مرسي رئيس الجمهورية فشل في تحقيق ده.

كنت اتمني اني اخرج النهاردة بعد مرور سنة علي انتخاب د.مرسي وانا باشكره علي اللي عمله لمصر , لكن وللاسف المشهد المصري دلوقتي بقي شديد الخطورة , وكل الاطراف متحفزة ضد بعض , واي واحد بيحب البلد دي لازم يكون قلقان من اللي بيحصل , لان الصراع الحالي ايا كان المنتصر فيه فمصر هتخسر , وعشان كده ضروري ان رئيس الجمهورية يقدم نموذج للمصري الوطني المخلص اللي بيحرص ان مصلحة الوطن تبقي اكبر من مصلحته الشخصية او مصلحة جماعته.

النهاردة باوجه ندائي لرئيس الجمهورية :
يا د. مرسي كل صوت انتخبك معتقد ان ' قوتنا في وحدتنا ' انت النهاردة خسرته
كل صوت انتخبك مؤمن بانك هتكون رئيسا لكل المصريين لا لاهلك وعشيرتك و المؤيدين لك انت النهاردة خسرته
كل صوت انتخبك مؤمن انك هتوفي بوعودك الانتخابية انت النهاردة خسرته

يا د. مرسي : مصر اكبر من اي تيار او جماعة او حزب وانت اعلنت بنفسك يوم توليك الرئاسة انه لا طاعة لنا عليك ان لم تف بتعهداتك وانك لن تخون الله فينا.

يا د. مرسي : اوقف الفتنة التي نحن علي اعتابها لله وللوطن : واعلن استقالتك قبل يوم 30 يونيو.