مبارك يفضح علاقة العمالة بين البرادعي و أمريكا و يشيد بابراهيم عيسى : أوباما طلب مني تسليم السلطة للبرادعي قبل التنحي

قال الرئيس السابق , حسني مبارك , معلقا علي احداث ثورة 25 يناير , التي استمرت 18 يوما ' , مش فاكر اليوم بالضبط -- كانت المظاهرات مستمرة في ميدان التحرير -- اتصل بي الرئيس الامريكي باراك اوباما -- اتصل مرتين او تلاتة ' ثلاثة ' -- وبصراحة ما رضتش ارد عليه -- '

واضاف قائلا , في تسجيلات صوتية منسوبه له , : ' في الآخر رديت -- فسالني : ايه الموقف عندك الآن ؟! -- وقبل ان ارد -- بادرني اوباما : انا رايي تسلم البلد لمجموعة من السياسيين منهم محمد البرادعي -- فقلت له : الكلام ده انت اللي بتقوله؟! -- فقال : نعم , فقلت له اسمع يا اوباما انا افهم الشعب المصري اكثر منك وانت تفهم الشعب الامريكي اكثر مني , وانا لا آخذ اوامر فيما يخص الشعب المصري , انا آخذ اوامري من الشعب المصري وحده , لو الناس عايزاني امشي , امشي فورا , وانا دوري اني انبه الشعب لخطورة الوضع اللي هوه فيه -- وبعدها انتهي الاتصال بيننا.

الاخوان و الدولة

وسال المصدر الرئيس السابق عن رايه في اداء الاخوان في الحكم , فاجاب :
شوف , كل اللي حكموا مصر يعرفوا الاخوان كويس يعني جمال عبد الناصر وانور السادات وانا نعرف عنهم كل حاجة -- ده بحكم موقعنا و التقارير و المعلومات , التي كانت تصل الينا -- علشان كده كان عبد الناصر يتعامل معهم بطريقة تحافظ علي البلد , لانهم كانوا عايزين ينقلبوا عليه اكثر من مرة -- و السادات غلط لما فتح لهم الابواب , هوه بصراحة كان راجل عظيم وكان عاوز ينفتح علي الكل -- بس هما طول عمرهم عايزين السلطة و الحكم -- و المشكلة انهم مش متعودين علي العمل في النور -- طول عمرهم بيشتغلوا في السر -- و الدولة مش ممكن تدار في السر -- دي دولة -- ودولة كبيرة وقديمة وعندها شعب كبير ومتنوع -- وفيه تعددية لازم نحافظ عليها -- هما مش فاهمين الكلام ده -- عندهم مشكلة مع العصر الحديث -- لكن احنا بحكم موقعنا كنا عارفين اسرار لا يعرفها الشعب , علشان كده انا بالتمس للناس العذر لما اختارتهم -- لانهم مجربوش الناس دول قبل كده.

يصمت مبارك قليلا ويضيف , انا بصراحة متفاجئ انا بصراحة متفاجئ من ادائهم -- كنت فاكرهم افضل من كده بكتير -- هما مش فاهمين مثلا في الاقتصاد -- بيشتغلوا فيه بطريقة ' التاجر ' -- وده غلط -- وكمان عندهم شك علي طول في كل الناس -- طيب ازاي هنشتغل ونرفع البلد ونحل الازمات واحنا عندنا شك في الشعب و المعارضة!!

انا وهيكل

◄ سيادتك -- هل تتابع التليفزيون و البرامج و الصحف؟!

_ طبعا -- بس الجرايد بتيجي لي ساعات وساعات لا -- وبحاول اتابع التليفزيون و الاخبار بقدر الامكان -- وكمان بتوصلني الاخبار لما تيجي لي زيارات بصراحة الاوضاع صعبة , ونفسي الامور تستقر في البلد.

◄ طيب -- هل تابعت الاستاذ محمد حسنين هيكل وما يقوله عن عهدك -- وايه سر موقفه منك؟

_ مش متابع قوي -- بس هيكل له حكاية معايا -- فاول ما توليت الحكم -- جاءني اسامة الباز وقال لي : ايه رايك في هيكل يكتب خطبك السياسية؟ّ -- ففكرت قليلا وقلت له : هيكل كان بيشتغل مع عبد الناصر -- وبعد كده استبعده السادات -- و المشكلة انه هيحط لي في الخطبة رايه -- ولما اغير حاجة او متعجبنيش حاجة -- هيزعل -- اسمع يا اسامة الراجل دا كان بيكتب لعبد الناصر معقولة هيكتب لي الخطب -- لا ميصحش -- وهربت منه كده.

ويضيف مبارك هيكل بيحط افكاره هوه -- وعايزني اقرا وبس -- وانا مش لعبة في ايد حد -- انا افكر واقول للي يكتب لي الخطبة اكتب كذا وكذا وكذا -- انا اقول لك انا عايز اتكلم في كيت وكيت حتي مرة موسي صبري كان بيكتب لي الخطبة ودا كان اول ما تعينت وقال لي موسي : لازم ندي امل الناس : وقولت له : لا ماينفعش تضحك علي الناس : الناس لازم تعرف الحقيقة : انا مش هضحك علي الناس -- علي فكرة انا اول ما تعينت كانت البلد تعبانة قوي -- بس مش بالفوضي الحالية.

ويستطرد ' مبارك ' : دول حتي بينسبوا كله لنفسهم. دا حتي مشروع قناة السويس احنا اللي عاملينه -- احنا عملنا مصانع هناك واعطينا الصين مساحات وشيدنا مباني -- ومن كام يوم شهدت مرسي و الحكومة و الاخوان عاملين قصة عن المشروع دا وكانه انجازتهم.

وتحدث ' مبارك ' في اجزاء مختلفة عن شخصيات محدودة علي الساحة الآن -- فحين سئل عما يقوله دكتور مصطفي الفقي في حلقات برنامجه عن فترة حكمه؟ -- اجاب : مصطفي الفقي ساب الرئاسة من زمان -- بس الواحد بيعرف الرجال في الصعاب , مصطفي الفقي بيكتب في الجرايد ويطلع في التليفزيونات عشان ياخد فلوس.

واستطرد مبارك , انا كمان بشوف ابراهيم عيسي -- الراجل ده محترم وبيقول الحق , ورغم انه كان بيعارضني الا انه بيعجبني لانه ما بيخافش , وحين سئل عن مرتضي منصور , علق ضاحكا : ده مدفع -- مدفع.