المايكرويف ليس للتسخين و الاذابة فقط تعرف على خمسة استخدامات مبتكرة للجهاز

المايكرويف اصبح من الاجهزة المنتشرة جدا في البيوت المصرية . خصوصا لمّا تكون ربة الاسرة امراة عاملة ووقتها مشغول دايما . فبالتالي بتعتبر المايكرويف هو مساعدها الاول في المطبخ . لانه بيساعدها في توفير وقت كتير في تسوية وتسخين الاكل واذابة الوجبات المجمّدة --

هنقدّم لك استخدامات جديدة للمايكرويف . ممكن تساعدك في توفير الوقت وتسهيل مهمتك في المطبخ --
1_ تطهير اسفنجة المطبخ وتحسين ريحتها :
قلنا قبل كده ان اسفنجة المطبخ من اكتر الحاجات اللي بتكون محمّلة بالجراثيم , ولتطهير اسفنجات وفوط المطبخ تقدري تستخدمي المايكرويف . بانك تغمسيهم في مية مضاف اليها كمية من الخل او عصير الليمون , وبعد كده حطّيهم في المايكرويف علي درجة حرارة عالية لمدة دقيقة , وبعد كده طلّعيهم , وبكده هيكون عندك اسفنجات نظيفة ومعقّمة وريحتها كويسة.

2_ تسخين مستحضرات التجميل :
اوقات كتير بتحتاجي تعملي حمام زيت لشعرك او ماسك لبشرتك , ويكون مكتوب في احتياطات الماسك انه يفضّل لو كان دافي شوية , وطبعا لان ماعندكيش وقت مش بتسخّنيه , مع ان الحرارة دي بتكون مفيدة في ان مكوّنات الماسك او حمام الزيت تدخل بسهولة في مسام بشرتك علشان الجلد يحقّق اقصي استفادة منها , مش بس كده ساعات بتحتاجي انك تدفّي السويت او الشمع اثناء عملية ازالة الشعر.

ممكن تستخدمي المايكرويف في الحالات دي في انك تحطّي فيه حمام الزيت او الماسك او قطعة السويت او الشمع لمدة 10 : 20 ثانية , وبعد كده ابدئي استخدميهم بس خلّي بالك انك تختبري الماسك علي جزء من بشرتك علشان تتاكدي ان درجة حرارته مناسبة.

3_ الحصول علي كمية اكبر من عصير الليمون :
وجود الليمون في الثلاجة لفترة طويلة بيقلّل كمية العصير اللي بتطلع منه لمّا بتيجي تستخدميه , علشان كده يفضّل انك تحطّيه في في المايكرويف لمدة 20 ثانية قبل ما تعصريه.

4_ تسوية الخضراوات :
المايكرويف ممكن يوفّر لك وقت كبير جدا في تحضير الخضار . يعني بدل ما تستني الميه لما تغلي علشان تسلقي فيها نوع خضار معين _زي الجزر او البسلة او الفاصوليا او الذرة او المشروم_ ممكن تستخدمي المايكرويف بانك تحطّي الخضار في طبق , ويفضّل انهم يكونوا في طبقة واحدة مستوية , وطبعا المدة بتختلف باختلاف نوع الخضار اللي بتطبخيه . يعني فيه انواع مش بتحتاج لاكتر من 30 ثانية . زي البسلة و السبانخ و المشروم , وفيه حاجات تانية بتحتاج لمدة 4 دقائق زي الجزر.

الطريقة دي مش بس بتوفّر الوقت , لكنها كمان تعتبر طريقة صحية جدا لطهي الخضراوات . لان كل ما وقت الطهي كان صغير كل ما الخضار احتفظ بقيمته الغذائية.

5_ مكان لتخمير العجين :
في وصفات المعجنات كتير بتكوني محتاجة لمكان دافئ ورطب علشان العجينة تختمر , دلوقتي ممكن تستخدمي المايكرويف كمكان جيّد لتخمير العجين بعد ما تسخّني فيه كوب ميه لغاية ما تبدا تتبخّر , وبعد كده طلّعيها وحطّي العجينة في المايكرويف من غير ما تشغّليه , وسيبيها لغاية ما تختمر وحجمها يتضاعف.